Më pak se dy muaj para zgjedhjeve, drejtuesi politik i PD-së për Tiranën, Belind Këlliçi, ka dalë në një konferencë për shtyp për të mbrojtur me çdo kusht mandatin e Sonila Bejtes. Kjo e fundit tashmë është shndërruar në simbolin e drejtësisë për opozitën, e cila prej javësh po bën ç’të mundet për ta mbajtur në detyrë bashkëshorten e Andi Bejtes, drejtuesit të Syri.tv.
Sikundër VNA ka raportuar muaj më parë, përpjekja e Elisa Spiropalit dhe Holta Zaçes për të zgjatur në mënyrë të paligjshme mandatin e kësaj të fundit dhe të Sonila Bejtes në mënyrë antikushtetuese nisi që në muajin tetor, kur për mandatin e anëtares së dorëhequr Elsa Toska u pretendua se përfundonte në vitin 2029. Me të njëjtën logjikë antikushtetuese, Holta Zace veproi edhe për mandatin e saj, e më pas për mandatin e Sonila Bejtes. Të tre mandatet e sipërpërmendura përfundojnë në vitin 2025, sipas Kushtetutës dhe rekomandimit të Komisionit të Venecias.
Ndërsa drejtësia kohët e fundit ka qenë në qendër të sulmeve të kryeministrit Rama dhe kryetarit të opozitës Berisha, duket se edhe Gjykata Kushtetuese ndodhet në qendër të kësaj rryme. Duhet sjellë në vëmendje se së fundmi SPAK ka autorizuar përgjimin e disa prej anëtarëve të kësaj gjykate si të dyshuar për përfshirje në tjetërsimin e vendimit për përgjimet e Sky Enchro. Çka të le të dyshosh se edhe shqetësimi i PD për anëtaren e deleguar në Gjykatën Kushtetuese ka të bëjë me rezultatin e këtyre hetimeve, të cilat mund të jenë përvëluese për ata anëtarë që kanë bashkëpunuar për të arsyetuar vendimin e Gjykatës Kushtetuese në favor të të akuzuarve të drejtësisë të përfshirë në hetimet për Sky Ecc
