Ka një gjë që nuk ndryshon kurrë në fjalorin e politikanëve shqiptarë: metaforat e huazuara, të konsumuara dhe të përsëritura deri në mërzi. Sot, Edi Rama foli në konferencë për kilometrin e fundit drejt Bashkimit Europian, duke na kujtuar menjëherë Sali Berishën, i cili prej muajsh u premton demokratëve se janë në kilometrin e fundit drejt fitores.
Dy kundërshtarë politikë, dy destinacione të ndryshme dhe e njëjta njësi matëse për të shitur optimizëm.
Berisha e ka nisur kilometrin e fundit që në janar të këtij viti. E ka përshkuar në protesta, konferenca shtypi, mbledhje partie dhe takime me demokratët. Madje, më 4 nëntor, pranoi se demokratët janë lodhur, por i siguroi sërish se kilometri i fundit është gjithmonë më i vështiri dhe se do ta përshkojnë drejt fitores.
Rama, nga ana tjetër, e ka vendosur kilometrin e tij në rrugën drejt Brukselit, ku integrimi europian vazhdon të jetë objektivi madhor i qeverisë.
Sigurisht, anëtarësimi në Bashkimin Europian dhe fitorja politike e opozitës janë dy procese krejt të ndryshme. Por kur vjen puna te retorika, kryeministri dhe kryetari i opozitës duket se nuk kanë nevojë as të kopjojnë njëri-tjetrin. U mjafton i njëjti fjalor.
Prej vitesh shqiptarëve u premtohen etapa historike, kthesa vendimtare, hapa gjigantë dhe finishi që është gjithmonë pranë. Ndryshojnë sloganet, ndryshojnë objektivat, por mbetet e pandryshuar bindja e politikanëve se destinacioni është vetëm pak metra larg.
Tani mbetet të shihet kush do ta përshkojë më parë kilometrin e fundit: Rama drejt Bashkimit Europian apo Berisha drejt fitores.
Sepse me ritmin që po ecin këto dy kilometra, shqiptarët rrezikojnë të plaken duke pritur tabelën e finishit.
