Kryeministri Edi Rama ka përsëritur edhe sot ftesën për dialog me studentët, të cilët prej disa javësh vijojnë protestat kundër qeverisë, duke kërkuar dorëheqjen e tij.
Pavarësisht refuzimit të vazhdueshëm nga ana e studentëve, kreu i qeverisë ka zgjedhur të rikthejë të njëjtën ftesë, tashmë të kthyer në një ritual banal në rrjetet sociale. Rama ka publikuar sërish në Facebook fotografinë e tavolinës së gurtë, mbi të cilën ka vendosur shënimet me mbishkrimin “Dialog”.
Por studentët duket se nuk kanë ndërmend t'i përgjigjen ftesës së kryeministrit. Ata kanë bërë të qartë se kërkesa e tyre nuk është ulja në tryezën e dialogut, por largimi i Ramës nga drejtimi i qeverisë.
Ndërkohë, protestat vijojnë prej disa javësh në kryeqytet, ku studentët marshojnë në rrugët e Tiranës dhe ndalen pranë fakulteteve, duke u bërë thirrje bashkëmoshatarëve të tyre t'i bashkohen lëvizjes.
Në mbështetje të protestuesve janë bashkuar edhe pedagogë, ndërsa bojkoti i procesit mësimor vijon si pjesë e qëndresës kundër qeverisë.
Teksa studentët kërkojnë dorëheqjen e tij, Rama vijon t'u përgjigjet me të njëjtën fotografi dhe të njëjtën ftesë për dialog, e cila deri më tani nuk ka arritur të ndryshojë qëndrimin e protestuesve.
