Është gjetur i pajetë nën rrënojat e pallatit 5-katësh në Elbasan 69-vjeçari Hamit Dibra, pronari i banesës ku dyshohet se nisi shpërthimi i fuqishëm i mesditës së të mërkurës. Me gjetjen e trupit të tij, numri i viktimave nga tragjedia në lagjen “Beqir Dardha” ka shkuar në dy.
Trupi i 69-vjeçarit u gjet nga ekipet e kërkim-shpëtimit të Forcave të Armatosura, pas orësh të tëra kërkimesh mes rrënojave të godinës.
Siç raportoi VNA një ditë më parë, Hamit Dibra dyshohet se kishte vendosur një bombol gazi në garazhin e pallatit, të cilën e kishte lidhur përmes tubacioneve me kuzhinën e apartamentit të tij. Dyshimet paraprake janë se shpërthimi mund të ketë ardhur nga ky instalim, por shkaqet mbeten ende për t’u përcaktuar nga ekspertiza.
Shpërthimi ishte aq i fuqishëm sa shembi muret dhe shkallët e pallatit, ndërsa tre kate të ndërtesës u bashkuan në një.
Viktima e parë e tragjedisë ishte Hatixhe Berisha, 83 vjeçe, e cila banonte në apartamentin ngjitur me atë ku ndodhi shpërthimi.
Dhjetë persona të tjerë pësuan asfiksi dhe morën ndihmë mjekësore në spital. Ata ndodhen jashtë rrezikut për jetën.
Pallati është shpallur i pabanueshëm për shkak të dëmtimeve të rënda strukturore. Banorët janë evakuuar, ndërsa autoritetet po marrin masa për sistemimin e tyre.
Ekspertiza pritet të përcaktojë nëse instalimi i dyshuar i gazit në garazhin e pallatit ishte shkaku i shpërthimit që u mori jetën dy personave dhe shkatërroi godinën.
