Kryebashkiaku i Tiranës, Erion Veliaj, është zhvendosur nga sektori A i paraburgimit në sektorin spitalor të burgut të Fierit. Lajmi konfirmohet nga Drejtoria e Përgjithshme e Burgjeve.
Zhvendosja është kryer brenda të njëjtit institucion penitenciar, ku Veliaj ndodhet pas transferimit nga paraburgimi i Durrësit.
Lëvizja vjen vetëm pak ditë pas vizitës së papritur të ministrit të Drejtësisë, Toni Gogu, në burgun e Fierit, ku ai zhvilloi një takim me kryebashkiakun e Tiranës.
Vizita e Gogut u shoqërua me një përplasje publike, pasi Veliaj dhe avokati i tij, Plarent Ndreca, pretenduan se ministri i kishte përcjellë kryebashkiakut kërcënime dhe presione politike. Ministri i Drejtësisë i ka mohuar këto pretendime.
Ende nuk janë bërë të ditura arsyet e zhvendosjes së Veliajt në sektorin spitalor dhe nëse vendimi lidhet me gjendjen e tij shëndetësore apo me masa të tjera të administrimit të paraburgimit.
