Mungesa e Ministrit të Drejtësisë, Toni Gogu, në Komisionin për të Drejtat e Njeriut dhe Mjetet e Informimit Publik në Kuvendin e Shqipërisë, ka shkaktuar përplasje politike dhe braktisjen e mbledhjes nga ana e opozitës.
Ministri, i cili më parë ka ushtruar funksionin e pastorit madje edhe në vetë dasmën e Veliajt, u bë qendra e një debati të ashpër pas pretendimeve të fundit publike të kryebashkiakut të Tiranës, Erion Veliaj.
Ajo që pritej të ishte një seancë dëgjimore për buxhetin, u shndërrua në një përplasje procedurale e politike pasi opozita kërkoi llogari urgjente për pretendimet se Gogu ka vepruar si "mesazher kërcënues" ndaj Veliajt në qelinë e tij në burgun e Fierit.
Së fundmi, përmes një letre të publikuar nga qelia ku ndodhet në paraburgim, Erion Veliaj ka denoncuar se Ministri i Drejtësisë, Toni Gogu, e ka vizituar natën (të premten në orën 22:30) për t'i përcjellë mesazhe kërcënuese me urdhër të Kryeministrit Edi Rama.
Sipas letrës së Veliajt, Gogu i ka kërkuar të zbatojë tri kushte e kërkesa ultimative:
* Të pranojë përfshirjen në organizimin ose financimin e protestave të studentëve — në të kundërt do t'i shtoheshin akuzat për "prishje të rendit kushtetues" nga burgu.
* Të heqë dorë nga drejtimi i Bashkisë së Tiranës dhe ta delegojë drejtimin e saj (te Arbër Hajdari).
* Të ndërpresë menjëherë çdo këshillim apo komunikim me avokatin e tij, Plarent Ndreca.
Opozita, e udhëhequr nga kryetarja e komisionit Jorida Tabaku, e konsideroi mospjesëmarrjen e ministrit si një braktisje dhe tentativë për t'u fshehur, duke refuzuar të vazhdojë me rendin e ditës për buxhetin pa praninë e tij dhe të Ministrit të Brendshëm.
Jorida Tabaku: "Ky Kuvend ka nevojë të marrë masa, të thërrasim ministrat e brendshëm dhe të drejtësisë, për të diskutuar. Se për herë të parë është vënë në pikëpyetje e drejta kushtetuese dhe janë kërcënuar të drejtat e njeriut."
Jorida Tabaku: "Të shkojë ministri i drejtësisë të kërcënojë dhe mos të kemi informacion. Për mua është kambanë alarmi. Sot është momenti të kemi transparencë. Kur kjo i ndodh Veliajt, çfarë i bëni ju kundërshtarit dhe qytetarit të thjeshtë."
Jorida Tabaku: "S’ka gjë më normale të vijë të raportojë këtu ministri, përkcontrazi, të vijë të raportojë të flasë dhe nëse ne kemi perceptim të gabuar të vijë të na e sqarojë."
Nga ana e tyre, deputetët e Partisë Socialiste u përpoqën të kalonin situatën dhe kërkuan kthimin te diskutimi i buxhetit, duke e cilësuar kërkesën e opozitës si "show" dhe politikë ditore:
Ramion Kurti: "Ministri i ka dhënë shpjegimet e veta. S'e di pse duhet të vijë këtu për të bërë atë politikën ditore."
Ardit Bido: "Ministri i Brendshëm ishte në Kuvend për interpelancë dhe ju refuzoni, pastaj bëni show duke kërkuar në komision."
Debati përfundoi me largimin e përfaqësuesve të opozitës nga salla e komisionit, ndërsa çështja e vizitës së ministrit në burgun e Fierit pritet të mbetet në qendër të stuhisë politike.
