Ndërsa studentët prej 22 ditësh protestojnë kundër qeverisë, me tensione që kanë arritur deri te djegia e Ministrisë së Arsimit, ministrja Mirela Kumbaro vijon të flasë për arritje historike dhe të premtojë një të ardhme më të mirë për arsimin. Këtë herë, optimizmi qeveritar është shfaqur në Komisionin Parlamentar për Edukimin, Shkencën dhe Sportet, gjatë prezantimit të projektbuxhetit të vitit 2027.
Kumbaro e cilësoi “historike” rritjen e buxhetit të arsimit, duke njoftuar se institucioni që drejton do të administrojë 67,95 miliardë lekë.
Ministrja premtoi më shumë mbështetje për studentët, përmirësim të cilësisë së arsimit dhe investime të reja, ndërsa theksoi se asnjë program buxhetor nuk do të ketë më pak fonde se vitin e kaluar.
Por ndoshta ministrja Kumbaro, përpara se të shpallë një tjetër sukses “historik”, duhet të reflektojë mbi realitetin e arsimit që drejton. Prej javësh, institucioni i saj është kthyer në epiqendër të protestave, madje me një pjesë të godinës të dëmtuar nga zjarri, ndërsa studentët kërkojnë dorëheqjen e qeverisë. Në këto kushte, marrja e përgjegjësisë politike dhe shqyrtimi i dorëheqjes do të ishin një përgjigje më serioze sesa retorika e zakonshme e sukseseve.
Sepse, përtej miliardave në letër, bilanci i arsimit nuk është aq optimist. Në fund të fundit, ministrja mund t'i shtojë miliardat në buxhet, por ende nuk ka gjetur formulën për të ndalur boshatisjen e bankave të shkollave dhe auditorëve.
