Kryebashkiaku Erion Veliaj, përmes një letre që u lexua nga trupa gjykuese, kërkonte hetim për kërcënimet që pretendon se i janë bërë në qeli nga ministri i Drejtësisë. Ndërsa ripërsëriti akuzën për rrëmbim policor dhe transferim në burgun e Fierit.
"Dëshiroj të përfaqësohem nga avokati Plarent Ndreca dhe dua të sqaroj se jam duke e bërë këtë deklaratë me vullnetin e lirë dhe pa asnjë presion. E nderuar gjykatë, siç edhe keni rënë në dijeni nga media, të mërkurën jam rrëmbyer nga një togë shoqërimi, pa asnjë shkak dhe vendim të komunikuar. Më kanë larguar familja, avokati dhe Bashkia, institucioni që drejtoj. Nuk e dija pse ndodhi kjo deri të premten në mbrëmje, kur m'u komunikua nga ministri i Drejtësisë, Toni Gogu, i cili ma bëri të qartë se transferimi ka ndodhur me kërkesë të kryeministrit Edi Rama, siç tha ai, që unë të bëja burg tamam. Ministri më komunikoi se do t'i kërkohej SPAK-ut të më hetonte edhe për prishje të rendit kushtetues, si i përfshirë në protestat e flamingove dhe studentëve. Kërkoj nga ju të kryeni një hetim të plotë dhe kam besim te ju", tha Veliaj.
Trupa gjykuese u shpreh në sallën e gjyqit se nuk është kompetente për sa i përket transferimit nga një IEVP në tjetrin. GJKKO theksoi se Drejtoria e Përgjithshme e Burgjeve nuk e ka njoftuar për transferimin e Veliajt, edhe pse ka detyrimin ta bëjë.
Sa u përket pretendimeve të tjera, gjykata theksoi se i pandehuri duhet të ndjekë rrugën ligjore.
Procesi ndaj Veliajt u shty për shkak të mungesës së një prej avokatëve në proces.
