Gjykata e Tiranës caktoi masën e sigurisë "arrest me burg" për Rei Nozllin, i cili dhunoi sekretarin e KZAZ nr. 30 në Kashar, pas një debati të ndezur për një votë të pavlefshme në favor të kandidatit të PS-së nga lista e hapur, Ornaldo Rakipi.
Ndaj tij rëndon akuza “Kanosje apo dhunim ndaj pjesëmarrësve në zgjedhje”. Pamjet e dhunës, të filmuara nga vëzhguesit e pranishëm, bënë xhiron e rrjeteve sociale.
Ngjarja ndodhi më 15 maj 2025, në ambientet e KZAZ nr. 30 në Kashar, gjatë procesit të numërimit të votave për kandidatët për deputetë në zgjedhjet e përgjithshme të mbajtura më 11 maj. Rreth orës 14:00, një nga numëruesit shpalli të pavlefshme një votë, çka shkaktoi reagimin e menjëhershëm të Rei Nozllit dhe disa personave të tjerë që ndodheshin aty, pa pasur statusin zyrtar të vëzhguesve.
Pas ndërhyrjes së sekretarit të KZAZ-së, R.M., i cili kërkoi qetësi dhe njoftoi se komisioni do të rishqyrtonte votën e kontestuar, situata u tensionua më tej. Sipas dëshmisë së kallëzuesit, Rei Nozlli kaloi shiritin e sigurisë dhe e goditi atë me grushte dhe shkelma. Pas tij ndërhynë edhe persona të tjerë, por u ndaluan nga numëruesit e pranishëm.
Pas veprimeve hetimore paraprake, Rei Nozlli u arrestua dhe akuzohet për veprën penale "Kanosje apo dhunim ndaj pjesëmarrësve në zgjedhje".
