Ish-presidenti Ilir Meta ka reaguar pas deklaratave të ish-bashkëshortes së tij, Monika Kryemadhi, dhënë sot pas daljes nga SPAK, ku Kryemadhi tha se nuk e intereson më “çfarë mendon apo bën Ilir Meta”.
Në një postim, Meta shkruan se pas zgjedhjeve i kishte kërkuar Kryemadhit që të mos e përmendte më publikisht, por sipas tij “kur të komandon halli, bëhesh ‘Zeqinja’ e SPAK-ut”.
Meta thekson se ai dhe zëdhënësi i PL-së, Tedi Blushi, kanë çmontuar publikisht akuzat e prokurorisë dhe se nuk ekzistojnë prova të reja që implikojnë atë, duke i cilësuar shpifje kriminale të orkestruara nga kreu i SPAK, Altin Dumani.
“Faktet dhe provat janë fshehur deri tani për të mbuluar personat që kanë shkelur ligjin dhe ata që kanë dëshmuar rrejshëm, duke qenë pjesë e listave të kandidatëve të ‘Rilindjes’,” shkruan Meta.
Ai shton se nëse akuzat për kartat bankare të përmendura nga prokuroria do të ishin të vërteta, SPAK nuk do t’i kishte dhënë leje Monika Kryemadhit të udhëtonte në SHBA, ku jeton Adrian Shatku, person i përfshirë në hetimet që po zhvillohen prej tre vitesh për lobimet.
Deklarata e Metës vjen pas fjalëve të Kryemadhit, e cila u shpreh sot: “Meta informohet për gjërat që i intereson grupi i tij i afërt sepse ai është në izolim. Nuk më intereson më fare të jem e sinqertë, se çfarë mendon apo thotë zoti Meta. Jam shumë e qetë në ndërgjegjen time për gjërat që kam bërë, bëj dhe do të bëj.”
