Kreu i Partisë Demokratike, Sali Berisha, është paraqitur sërish sot paradite në Prokurorinë e Posaçme (SPAK), në zbatim të masës së sigurisë “detyrim paraqitje” për çështjen e privatizimit të ish-kompleksit sportiv “Partizani”. Berisha dhe dhëndri i tij, Jamarbër Malltezi, janë nën hetim për këtë çështje, ndërsa ish-kryeministri e ka cilësuar më herët këtë masë si një “krim kushtetues”.
Pas daljes nga SPAK, Berisha publikoi mesazhin që kishte lënë në policinë gjyqësore, duke akuzuar kreun e SPAK, Altin Dumani, se ka vendosur institucionin “në shërbim të karteleve të drogës dhe të krimeve zgjedhore e mjedisore të qeverisë”. Sipas Berishës, Dumani është “delinkuenti numër 2 për kriminalitetin në Shqipëri pas Edi Ramës” dhe e akuzoi atë se po mbron aferat kriminale të qeverisë dhe të pushtetarëve.
Berisha foli gjithashtu për situatën e ndotjes dhe zjarrit në landfillin e Elbasanit, të cilin e quajti një “krim të rëndë mjedisor” që po zhvillohet prej gjashtë ditësh pa asnjë ndërhyrje, duke theksuar se ky institucion nuk po vepron pavarësisht pasojave të rënda që, sipas tij, shkakton djegia e mbetjeve për qytetarët, përfshirë rrezikun e dioksinës dhe sëmundjeve kancerogjene. Sipas kreut të PD-së, edhe djegiet e përsëritura të fushës së mbetjeve në Vlorë, që ndodhin çdo tre muaj, janë pjesë e të njëjtit “krim të heshtur” që SPAK nuk e heton për shkak të varësisë nga qeveria.
Berisha akuzoi drejtuesit e SPAK se “kanë vënë institucionin në funksion të partisë së krimit dhe të pushtetarëve të korruptuar”, ndërsa deklaroi se do të vazhdojë të paraqitet pranë SPAK si detyrim ligjor, duke e konsideruar këtë proces një akt hakmarrjeje politike ndaj tij dhe opozitës.
