Një oficer policie përfundoi në pranga pasi jepte para me fajde qytetarëve të ndryshëm dhe më pas, përmes shantazhit, i detyronte t’i kthenin shuma të mëdha parash ose, në të kundërt, merrte pasuritë e tyre.
Në kuadër të aksionit “Last Rent”, Agjencia e Mbikëqyrjes Policore arrestoi nënkomisarin Edison Pema, me detyrë Specialist për Hetimin e Krimeve në Seksionin për Hetimin e Narkotikëve në Drejtorinë Vendore të Policisë, Elbasan.
Nga hetimet rezultoi se nënkomisari u jepte para me fajde personave të ndryshëm dhe më pas, nëpërmjet kanosjes ose dhunës, i shtrëngonte këta të fundit për kthimin e vlerave të konsiderueshme të parave.
“Në cilësinë e provës materiale iu sekuestruan 5 automjete të vitprodhimeve të fundit, në pronësi të personave të ndryshëm”, njoftoi AMP.
