Një 65-vjeçar që ndodhej nën masën e arrestit në shtëpi nga SPAK dhe djali i tij kishin ngritur brenda shtëpisë së tyre një laborator për falsifikimin e dokumenteve dhe pasaportave, me të cilat shumë shqiptarë kalonin kufirin në mënyrë të paligjshme.
Në kuadër të operacionit “Identiteti” u arrestuan shtetasit Ylli Brahimaj dhe Pjerin Brahimaj, ndërsa po hetohet në gjendje të lirë bashkëpunëtori i tyre 62-vjeçar. Hetimi zgjati më shumë se shtatë muaj dhe policia deklaroi se gjatë kontrollit të banesës, shërbimet e Policisë zbuluan një ambient të fshehtë, të kthyer në laborator për prodhimin dhe falsifikimin e dokumenteve të ndryshme dhe pasaportave.
Nga hetimet ka rezultuar se prodhimi i një pasaporte të falsifikuar me shtetësi të huaj arrinte në vlerat nga 15 000 deri në 20 000 euro. Këto pasaporta dyshohet se përdoreshin për kalimin e paligjshëm drejt vendeve të Bashkimit Evropian ose SHBA.
Po punohet për identifikimin e personave të tjerë të përfshirë në këtë aktivitet.
