Gjykata e Posaçme Kundër Korrupsionit dhe Krimit të Organizuar (GJKKO) ka vendosur sot të lërë në fuqi masën e sigurisë “detyrim paraqitje” dhe pezullimin nga detyra për kreun e Komisionit të Prokurimeve Publike, Jonaid Myzyri.
Myzyri akuzohet nga SPAK për “shkelje të barazisë në tendera”, kryer në bashkëpunim, në lidhje me tenderin për mirëmbajtjen e aksit rrugor Shpal-Ura e Repsit, me një gjatësi totale 58.7 kilometra dhe një vlerë prej 2.29 milionë euro.
Më 24 qershor, SPAK e mori zyrtarisht të pandehur Myzyrin, ndërsa vendimi i sotëm i GJKKO detyron kreun e Komisionit të Prokurimeve Publike të paraqitet periodikisht para autoriteteve, duke e mbajtur larg detyrës deri në një vendim përfundimtar të çështjes.
