Dikur njerëzit prisnin në radhë për bileta koncertesh ose për të blerë një produkt të shumëkërkuar. Sot mund të presin për orë të tëra për një biskotë, një frozen yogurt apo edhe një patate të pjekur.
Radhët virale jashtë lokaleve janë kthyer në një fenomen të ri të ushqimit, të nxitur kryesisht nga TikTok dhe Instagram. Në disa raste, pritja është bërë pothuajse po aq e rëndësishme sa vetë ushqimi.
Një nga shembujt më ekstremë vjen nga Preston në Angli, ku biznesi SpudBros shet patate të pjekura nga një vagon i vjetër tramvaji.
Bashkëthemeluesi Jacob Nelson thotë se në ditët më të ngarkuara kanë pasur deri në 2 mijë persona në radhë dhe disa klientë madje kanë ngritur kamp për të pritur pothuajse 24 orë për një patate. Vetë biznesi thekson se nuk i nxit njerëzit të presin kaq gjatë.
SpudBros ka më shumë se një milion ndjekës në Instagram dhe vëllezërit që drejtojnë biznesin janë kthyer praktikisht në influencerë. Ata kanë bashkëpunuar madje edhe me YouTuber-in MrBeast.
Por fenomeni nuk kufizohet te një patate.
Në Notting Hill të Londrës, klientët po rreshtohen jashtë Yo-Chi, një zinxhir frozen yogurt-i që hapi pikën e tij vetëm pak javë më parë. Disa prej tyre thonë se e zbuluan lokalin përmes videove në TikTok që madje informonin ndjekësit mbi gjatësinë e radhës.
Biznesi e ka kthyer vetë pritjen në pjesë të eksperiencës. Në fundjavë ka DJ dhe disco ball, ndërsa punonjësit organizojnë lojëra për njerëzit që presin jashtë.
Në një tjetër rast, CZER në Londër planifikonte fillimisht të shiste rreth 50 wrap në ditë. Pas promovimit në rrjetet sociale, kërkesa u rrit pothuajse menjëherë në rreth 400 në ditë.
Viraliteti mund të jetë shpëtim për një industri që përballet me kosto gjithnjë e më të larta. Në Britani, një pjesë e konsiderueshme e bareve, pub-eve dhe restoranteve po punojnë me humbje dhe mbushja e lokalit përmes rrjeteve sociale mund të bëjë diferencën mes mbijetesës dhe mbylljes.
Por fama online ka edhe një anë më pak tërheqëse.
August Bakery në jugperëndim të Londrës pa radhët të shpërthenin pasi një profil i njohur në Instagram publikoi një recension pozitiv. Prej atëherë, stafi përballet vazhdimisht me njerëz që kërkojnë pikërisht produktin që kanë parë në video, edhe kur menuja ka ndryshuar.
Ka edhe probleme praktike. Radhët e gjata e bëjnë lokalin më pak të aksesueshëm për personat që nuk mund të qëndrojnë gjatë në këmbë. Gjatë valëve të të nxehtit, drejtuesit e furrës thanë se pati edhe njerëz që humbën ndjenjat duke pritur.
Fenomeni ngre një pyetje interesante: njerëzit po presin sepse ushqimi është vërtet i jashtëzakonshëm, apo sepse videot e mijëra njerëzve në radhë i bindin se duhet ta provojnë?
Në epokën e TikTok-ut, vetë radha është kthyer në reklamë.
Sa më shumë njerëz presin, aq më shumë të tjerë ndalojnë, filmojnë, publikojnë dhe krijojnë përshtypjen se pas derës duhet të ketë diçka që nuk mund të humbet.
Në këtë mënyrë, një patate e zakonshme mund të shndërrohet në destinacion turistik dhe pritja prej disa orësh në pjesë të historisë që klienti dëshiron të postojë online.
