Një konflikt i armatosur që ndodhi në shtator 2024 jashtë një klubi nate në Pire, midis dy grupeve kriminale, është zbardhur nga Drejtoria për Luftimin e Krimit të Organizuar në Policinë Greke. Hetimet e thelluara dhe veprimet e koordinuara policore çuan në arrestimin e 12 personave, shqiptarë dhe grekë, mes tyre edhe një punonjës policie.
Ngjarja ka ndodhur në orët e para të mëngjesit të datës 29.09.2024, kur dy grupe kriminale, me nga të paktën gjashtë persona secila, u përleshën fillimisht fizikisht – me grushte dhe shqelma – jashtë një klubi nate në Pire. Konflikti më pas eskaloi në shkëmbim zjarri me armë, duke tronditur zonën.
Si rezultat i hetimeve të plota dhe kontrolleve fizike në banesa dhe mjete, u sekuestruan armë dhe sende të shumta të paligjshme: një pistoletë me karikator me 10 fishekë, një revolver me 6 fishekë, një tjetër pistoletë me një fishek në dhomë, një armë gjahu, fishekë të kalibrave të ndryshëm, 2 karikatorë, një këllëf pistolete, 14 thika të llojeve të ndryshme, veshje të përdorura gjatë konfliktit, tableta anabolike, një palë doreza, 3 automjete dhe një motor, sasi marijuane me peshë 2.4 gram, si dhe një shumë parash prej 175.470 eurosh.
Të arrestuarit, përmes një dosjeje të ngritur ndaj tyre, akuzohen për një sërë veprash penale të rënda, përfshirë: krijimin e një organizate kriminale, tentativë për vrasje me dashje, dëmtime të rënda trupore, shkelje të detyrës, si dhe shkelje të ligjeve për armët dhe lëndët narkotike.
Hetimet kanë zbuluar se shumica e të ndaluarve kanë të kaluar kriminale për vepra të ngjashme dhe të tjera penale, ndërkohë që autoritetet greke po vazhdojnë hetimin për të zbardhur në tërësi fushëveprimin dhe lidhjet e kësaj organizate kriminale.
