Jamarbër Malltezi, dhëndri i ish-kryeministrit Sali Berisha, u lirua nga masa e arrestit shtëpiak ku mbahej prej më shumë se një viti, kundrejt një garancie pasurore prej 3 milionë lekësh. Vendimi u mor nga treshja gjykuese e kryesuar nga gjyqtarja Elsa Ulliri dhe anëtaret Rudina Palloi e Bibë Ndreca, e njëjta trupë që shqyrton në themel dosjen “Partizani”, e cila shqyrtoi kërkesën e Malltezit për zëvendësimin e masës së sigurisë.
Gjatë seancës u relatua se ishte rrëzuar kërkesa e gjyqtares Elsa Ulliri për dorëheqje nga shqyrtimi i dosjes. Ulliri kërkoi të largohej nga trupa, duke pretenduar se, për shkak të lidhjes familjare me një deputete të PD-së, vlerësonte se ishte në konflikt interesi.
Jamarbër Malltezi është i pandehur për akuzat e korrupsionit dhe pastrimit të parave, në të njëjtën dosje me vjehrrin e tij, kreun e PD-së Sali Berisha, nën akuzë për korrupsion. Në dosjen “Partizani” janë të pandehur edhe 3 persona të tjerë.
Seanca e parë e datës 30 qershor u shty, për shkak të mos marrjes dijeni nga ana e z. Berisha, ndërsa është caktuar data 21 korrik për seancën e radhës.
