Presidenti i Ukrainës, Volodymyr Zelensky, ka deklaruar se qëndrimi i Kievit ndaj Kosovës mbetet i pandryshuar, duke konfirmuar se Ukraina vazhdon të mos e njohë pavarësinë e shpallur të Kosovës.
Në përgjigje të një pyetjeje nëse Serbia mund të llogarisë ende në këtë qëndrim të Ukrainës, Zelensky theksoi se vendi i tij respekton integritetin territorial dhe të drejtën ndërkombëtare.
“Qëndrimi ynë lidhur me shpalljen e njëanshme të pavarësisë së Kosovës mbetet i pandryshuar”, deklaroi presidenti ukrainas.
Zelensky shtoi se Ukraina është mirënjohëse ndaj shteteve që respektojnë integritetin territorial dhe sovranitetin e saj, duke përmendur në mënyrë të veçantë qëndrimin se Krimea është pjesë e Ukrainës.
Ai iu referua edhe Serbisë, duke theksuar se Beogradi gjithashtu nuk e ka ndryshuar qëndrimin e tij lidhur me integritetin territorial të Ukrainës.
Deklarata e Zelenskyt konfirmojnë kështu se, pavarësisht marrëdhënieve të Ukrainës me Kosovën dhe bashkëpunimit me partnerët në rajon, Kievi vazhdon të mbajë të njëjtin qëndrim zyrtar për statusin e Kosovës.
