Një kompani amerikane e naftës, e lidhur me presidentin Donald Trump, po përgatitet të nisë shpime kërkimore në një zonë të largët të Grenlandës, pavarësisht se ende nuk ka marrë miratimin zyrtar nga autoritetet lokale.
Pajisje dhe materiale për shpimet janë transportuar ditët e fundit në bregun lindor të Grenlandës, duke shkaktuar reagimin e qeverisë lokale. Autoritetet kanë lëshuar një paralajmërim të fortë, duke theksuar se shkarkimi i pajisjeve nuk ishte autorizuar dhe se çdo aktivitet i mëtejshëm logjistik duhet të njoftohet dhe miratohet paraprakisht.
Pas projektit qëndron kompania nga Teksasi “Greenland Energy”, e themeluar vitin e kaluar. Drejtuesit e saj pretendojnë se nëntoka e rajonit Jameson Land mund të fshehë rezerva nafte me vlerë deri në 1 trilion dollarë, ndërsa kompania planifikon të investojë rreth 60 milionë dollarë për shpimin e dy puseve kërkimore.
Projekti vjen në një moment veçanërisht të ndjeshëm, pasi Donald Trump ka përsëritur vazhdimisht interesin e tij për rritjen e kontrollit dhe ndikimit amerikan mbi Grenlandën. Vetëm dy ditë pas paralajmërimit të autoriteteve lokale, Trump publikoi edhe një fotomontazh në rrjetin e tij Truth Social, ku shfaqej mbi një fshat të Grenlandës.
Grenlanda ka pezulluar që prej vitit 2021 dhënien e licencave të reja për kërkimin e naftës për arsye mjedisore, ndërsa zona ku synohen shpimet ndodhet brenda një territori të mbrojtur sipas Konventës Ramsar për ligatinat. Megjithatë, kompania britanike “80 Mile” kishte siguruar më herët të drejta kërkimi në këtë zonë.Projekti ka tërhequr vëmendje edhe për emrat e përfshirë. Kompania ka angazhuar Phil McGraw, i njohur si Dr. Phil, për realizimin e një serie dokumentarësh mbi projektin, ndërsa në drejtimin e saj është përfshirë edhe një veteran i Marinës amerikane, i lidhur me projektin e mbrojtjes raketore “Golden Dome”.
Tashmë autoritetet e Grenlandës përballen me një vendim të vështirë, të lejojnë kërkimet për naftë në një zonë të mbrojtur apo të refuzojnë projektin, duke rrezikuar që kjo të përdoret nga administrata Trump si argument për të shtuar presionin dhe ndikimin amerikan mbi territorin gjysmëautonom të Danimarkës.
