Vullkani Etna, një nga më ativët në botë dhe më i larti aktiv në Europë, ka shpërthyer sërish këtë të shtunë, duke lëshuar në atmosferë një re të madhe tymi dhe hiri mbi Siçili.
Aktiviteti vullkanik detyroi autoritetet të mbyllnin përkohësisht një pjesë të hapësirës ajrore mbi ishull. Aeroporti i Katanias njoftoi pezullimin e të gjitha fluturimeve në mbërritje deri në orën 12:00, me orën lokale, për shkak të hirit vullkanik në atmosferë.
Fluturimet në nisje vijuan normalisht për avionët që ndodheshin tashmë në aeroport.
Sipas njoftimit të aeroportit, u mbyll sektori ajror që korrespondonte me renë e hirit vullkanik. Aeroporti i Katanias është porta kryesore ajrore për lindjen e Siçilisë, një nga zonat më të frekuentuara turistike të Italisë, ndaj çdo shpërthim i Etnës krijon menjëherë probleme në trafikun ajror.
Pamjet e Institutit Kombëtar italian të Gjeofizikës dhe Vullkanologjisë treguan një kolonë të dendur tymi që ngrihej nga maja e vullkanit. Etna, me lartësi rreth 3,324 metra, ka shpërthyer shpesh gjatë historisë dhe mbetet një nga vullkanet më të monitoruara në Europë.
Hiri vullkanik preku edhe disa fluturime nga Malta drejt Siçilisë, ndërsa kufizimet në mbërritje mbetën në fuqi deri në mesditë.
Pavarësisht spektaklit natyror, rreziku kryesor në këtë rast lidhej me transportin ajror. Grimcat e hirit vullkanik mund të jenë problematike për motorët e avionëve, ndaj aeroportet pranë Etnës shpesh kufizojnë ose pezullojnë fluturimet kur reja e hirit afrohet mbi korridoret ajrore.
