Senati i Shteteve të Bashkuara, i kontrolluar nga republikanët, ka miratuar një projektligj dypartiak që parashikon sanksione të reja ndaj Rusisë dhe masa ndëshkuese për vendet që vazhdojnë të blejnë naftë dhe gaz rus.
Nisma, e mbështetur fuqishëm nga senatori republikan Lindsey Graham para vdekjes së tij muajin e kaluar në moshën 71-vjeçare, u miratua të premten me 86 vota pro dhe 11 kundër.
Projektligji synon të rrisë presionin ekonomik ndaj Moskës dhe të nxisë përfundimin e luftës në Ukrainë. Masat përfshijnë sanksione ndaj zyrtarëve të lartë rusë, ndërsa presidentit amerikan Donald Trump i jepet mundësia të vendosë tarifa deri në 100 për qind ndaj vendeve që blejnë energji nga Rusia, duke synuar veçanërisht importues të mëdhenj si Kina dhe India. Paketa përfshin gjithashtu zgjatjen e disa sanksioneve ndaj Iranit.
Para vdekjes së tij, Graham ishte takuar me presidentin ukrainas Volodymyr Zelensky dhe kishte deklaruar se kishte siguruar mbështetjen e Shtëpisë së Bardhë për projektligjin. Pas ndarjes së tij nga jeta, kolegët në Senat kanë propozuar që legjislacioni të mbajë emrin e tij në shenjë nderimi për rolin që pati në hartimin dhe promovimin e nismës.
Projektligji tashmë duhet të kalojë edhe në Dhomën e Përfaqësuesve përpara se t'i dërgohet presidentit Trump për firmosje. Kreu i Shtëpisë së Bardhë ka sinjalizuar mbështetjen e tij për masat, ndërsa kryetari i Dhomës së Përfaqësuesve, Mike Johnson, gjithashtu ka shprehur mbështetje për nismën.
Megjithatë, miratimi në Dhomën e Përfaqësuesve mund të përballet me pengesa, pasi disa demokratë kanë shprehur shqetësime për kompetencat e reja që projektligji i jep presidentit amerikan për vendosjen e tarifave ndaj vendeve që blejnë energji ruse.
