Presidenti amerikan Donald Trump ka deklaruar se Shtetet e Bashkuara duhet të ruajnë avantazhin ndaj Kinës në fushën e inteligjencës artificiale dhe kriptovalutave, duke i cilësuar këto teknologji si vendimtare për të ardhmen ekonomike dhe strategjike të botës.
Në një intervistë për “Punchbowl News”, Trump tha se Uashingtoni nuk mund të lejojë që Pekini të marrë epërsinë në zhvillimin e inteligjencës artificiale apo në tregun e kriptomonedhave.
“Nuk duam ta shohim Kinën të marrë përsipër kriptovalutat. Nuk dua ta shoh Kinën të fitojë me AI”, u shpreh presidenti amerikan.
Trump argumentoi se SHBA-ja aktualisht është në avantazh në garën për inteligjencën artificiale, duke theksuar se vendi që do të udhëheqë këtë sektor do të ketë ndikim të madh global në vitet e ardhshme.
Sipas tij, inteligjenca artificiale do të ketë një ndikim edhe më të madh se interneti dhe do të transformojë mënyrën se si funksionojnë ekonomitë dhe shoqëritë.
Presidenti amerikan foli gjithashtu për rritjen e përdorimit të Bitcoin dhe kriptovalutave, duke thënë se pagesat dixhitale po bëhen gjithnjë e më të zakonshme, ndërsa përdorimi i parasë fizike po bie.
Trump theksoi edhe rëndësinë e qendrave të të dhënave në zhvillimin e inteligjencës artificiale, duke thënë se investimet në këtë sektor mund të sjellin të ardhura të mëdha dhe të forcojnë pozicionin e SHBA-së në konkurrencën globale.
“Nuk mund ta lejojmë Kinën të na mposhtë në këtë”, përfundoi Trump.
