Një dosje e sigurisë së policisë amerikane ka zbuluar përmasat e kërcënimeve që shoqëruan Kupën e Botës, duke nxjerrë në pah masat e jashtëzakonshme të marra për mbrojtjen e futbollistëve, gjyqtarëve dhe organizatorëve gjatë turneut.
Sipas dokumenteve të publikuara nga The Sun, bazuar në informacionet e Informacion.es, kombëtarja e Argjentinës dhe Lionel Messi ishin ndër objektivat kryesorë të kërcënimeve. Para ndeshjes ndaj Jordanisë, një person telefonoi aeroportin e Dallasit duke pretenduar se do të hynte në stadium i armatosur së bashku me dy persona të tjerë dhe do të sulmonte policinë dhe futbollistët, duke përmendur edhe Messin si objektiv.
Një tjetër alarm u regjistrua para sfidës Argjentinë-Egjipt, kur një përdorues në rrjetin social X kërcënoi se do të kryente një sulm me lëndë shpërthyese në stadiumin e Atlantës, ndërsa gjatë ndeshjes autoritetet morën edhe një sinjalizim për mjete shpërthyese në tribuna. Policia aktivizoi menjëherë njësitë kundër eksplozivëve dhe qentë e specializuar, por alarmet rezultuan të rreme.
Në raportet e sigurisë përmendet edhe Cristiano Ronaldo. Një punonjës i FIFA-s raportoi se një person po kërkonte informacione për vendndodhjen e portugezit, ndërsa një tifoz arriti të hynte në hotelin ku ishte akomoduar Ronaldo dhe tentoi t'i afrohej në ashensor. Ai u ndalua nga policia dhe deklaroi se synonte vetëm të bënte një fotografi.
Presioni nuk kurseu as gjyqtarët. Francezi François Letexier mori mbi 6 mijë mesazhe kërcënuese në WhatsApp pas ndeshjes Argjentinë-Egjipt, ndërsa arbitri i VAR-it, Willy Delajod, u kërcënua me jetë nga tifozë të zemëruar.
Në shënjestër përfunduan edhe futbollistët. Sulmuesi norvegjez Alexander Sorloth dhe bashkëshortja e tij morën kërcënime pasi ai nuk ia pasoi topin Erling Haalandit në çerekfinalen ndaj Anglisë, ndërsa kolumbiani Jaminton Campaz u sulmua në rrjetet sociale pas një penalltie të humbur. Raporti rikujton edhe rastin tragjik të Andres Escobar, i cili u vra pas autogolit në Botërorin e vitit 1994.
Ndër incidentet e tjera të raportuara përfshihen djegia e një figure me emrin e Kylian Mbappe nga tifozë në Paraguaj, thirrje raciste ndaj sulmuesit francez, masa të shtuara sigurie për kombëtaren e Koresë së Jugut pas eliminimit nga turneu, si dhe një shkelje sigurie në kampin e Anglisë, ku një person hyri në qendrën mediatike duke bërtitur.
Sipas raportimeve, Kupa e Botës konsiderohet si një nga turnetë më të fortifikuar në histori, me një operacion të gjerë sigurie që zhvillohej paralelisht me spektaklin në fushën e lojës.
