Portieri i Kombëtares së Kepit të Gjelbër, Vozinha, vazhdon të jetë në qendër të vëmendjes edhe pas transferimit te gjiganti kilian Colo-Colo, pas paraqitjeve mbresëlënëse në Kupën e Botës.
40-vjeçari u bë një nga zbulimet e turneut, duke tërhequr interesin e disa klubeve, ndërsa në fund vendosi të vazhdojë karrierën te Colo-Colo, ku u prit me entuziazëm të jashtëzakonshëm nga tifozët.
Pas mbërritjes së tij në Kili, u raportua se Vozinha nuk do të lejohej të mbante nofkën e tij në fanellë, pasi rregulloret e Federatës Kiliane të Futbollit parashikojnë përdorimin e mbiemrit të lojtarëve.
Megjithatë, federata ka bërë një përjashtim të rrallë, duke i dhënë leje portierit që në fanellën me numrin 29 të shkruajë “Vozinha”, emri me të cilin është bërë i njohur në futbollin botëror.
Ky vendim konsiderohet një precedent në futbollin kilian dhe vjen si pasojë e popullaritetit të madh që portieri ka fituar pas Botërorit.
Emri i tij i plotë është Josimar Jose Evora Dias, ndërsa te Colo-Colo u transferua si lojtar i lirë pas largimit nga skuadra portugeze Chaves. Gjatë karrierës së tij ai ka luajtur edhe për Trencin, AEL Limassol, Gil Vicente, Zimbru, Mindelense, Progresso do Sambizanga dhe Batuque.
