Kayserispor ka zyrtarizuar dy përforcime të rëndësishme për sezonin e ri, duke prezantuar brenda së njëjtës ditë dy futbollistë shqiptarë, Florent Hasanin dhe Taulant Seferin.
Klubi turk konfirmoi afrimin e dy sulmuesve, të cilët pritet të rrisin cilësinë e repartit ofensiv në Superligën turke. Florent Hasani, përfaqësues i Kosovës, transferohet te Kayserispor pas një sezoni të suksesshëm me Amedspor, ku në 37 ndeshje realizoi 18 gola dhe dhuroi shtatë asiste.
Ndërkohë, Kayserispor ka siguruar edhe firmën e Taulant Seferit. Sulmuesi i Kombëtares shqiptare vjen pas një edicioni mjaft pozitiv me Bodrum, ku shënoi 16 gola dhe regjistroi shtatë asiste, duke qenë një nga lojtarët më të spikatur të skuadrës.
Me afrimin e Hasanit dhe Seferit, Kayserispor krijon një dyshe shqiptare në sulm, duke i ofruar trajnerit më shumë alternativa në fazën ofensive. Dy futbollistët pritet të kenë një rol të rëndësishëm në objektivat e klubit për sezonin e ri, ndërsa ky transferim konfirmon edhe besimin e drejtuesve të Kayserisporit te cilësia e futbollistëve shqiptarë.
