Aktivisti i njohur për kauzat qytetare, Andi Tepelena, ka dorëzuar zyrtarisht një kërkesë pranë Komisionit Qendror të Zgjedhjeve (KQZ), duke i kërkuar publikimin e kontratës mes KQZ-së dhe kompanisë DHL Express, lidhur me procesin e votimit të diasporës.
Sipas Tepelenës, kontrata kap vlerën e 9.2 milionë eurove, një shumë e konsiderueshme e marrë nga buxheti i shtetit, pra nga taksat e qytetarëve shqiptarë. Ai kritikon mungesën totale të transparencës, pasi kontrata nuk është bërë publike në asnjë platformë online.
“KQZ dhe Ilirjan Celibashi paguhen nga taksat tona. Si taksapagues i rregullt, kam të drejtën legjitime të njihem me këtë kontratë dhe çdo qindarkë të shpenzuar nga taksat e mia (tonat)”, shprehet Tepelena në deklaratën e tij publike.
Duke iu referuar ligjit për të drejtën e informimit, ai kujton se institucioni ka një afat prej 10 ditësh për të kthyer përgjigje zyrtare ndaj kërkesës.
