Në veprimtarinë e organizuar me rastin e 100-vjetorit të krijimit të Kontrollit të Lartë të Shtetit (KLSH), Ambasadori i Bashkimit Europian në Shqipëri, Silvio Gonzato, vlerësoi institucionin për funksionimin e tij modern dhe të pavarur. Ai theksoi rëndësinë e këtij institucioni në rrugëtimin e Shqipërisë drejt anëtarësimit në BE, duke nënvizuar se pavarësia e KLSH-së është thelbësore për garantimin e kontrollit të fondeve publike.
“Fakti që ky institucion u krijua kaq shpejt pas shpalljes së pavarësisë, dëshmon rëndësinë që ka për funksionimin modern të shtetit. Gjatë dekadës së fundit, KLSH është transformuar nga një organ kombëtar i kontrollit fiskal në një institucion të pavarur, duke luajtur një rol të rëndësishëm në vlerësimin e sundimit të ligjit, funksionimit të demokracisë dhe luftës kundër korrupsionit,” – tha Gonzato.
Ambasadori përmendi gjithashtu se roli i KLSH-së lidhet drejtpërdrejt me kreun 32 të kontrollit financiar në kuadër të negociatave të anëtarësimit në BE, duke nënvizuar nevojën që ky institucion të mbetet i pavarur dhe të pajiset me burimet e duhura për të përmbushur misionin e tij.
Këto deklarata të Gonzato-s vijnë në një kohë kur parlamenti aktual është përfshirë në debate për rritjen e mekanizmave të kontrollit ndaj institucioneve të pavarura, përfshirë KLSH-në. Të njëjtat mekanizma janë përpjekur të aplikohen edhe ndaj SPAK-ut, çka ka sjellë tensione të dukshme mes qeverisë dhe organeve të drejtësisë.
Jo më larg se dje, ministri i Drejtësisë, Ulsi Manja, dhe kreu i SPAK-ut, Altin Dumani, patën një përplasje publike mbi këtë çështje. Përplasja nxori në pah shqetësimet për pavarësinë e institucioneve, me opozitën dhe partnerët ndërkombëtarë që kanë theksuar rëndësinë e mbrojtjes së integritetit të tyre për të garantuar një shtet demokratik dhe funksional.
