Jorida Tabaku ka arritur një sukses të rëndësishëm në zgjedhjet parlamentare, duke siguruar mbi 20 mijë vota në Tiranë dhe duke u bërë kandidatja më e votuar për Partinë Demokratike. Megjithatë, Adriana Kalaja, një tjetër kandidate nga lista e hapur e PD-së për Tiranën, ka shprehur dyshime për këtë rezultat.
Në një koment në “Facebook”, Kalaja ka akuzuar kryeministrin Edi Rama për blerjen e votave preferenciale në favor të Tabakut. Sipas saj, kjo ishte një lëvizje për të poshtëruar ish-kryeministrin Sali Berisha dhe për të krijuar një opozitë të kontrolluar.
“Votat e Sude Tabakut ja bleu Rama me oligarkët dhe këtë e dinë të gjithë. Qëllimi: për të poshtëruar Berishën, për të mbuluar blerjen e atyre të vetëve si Sara Mile dhe për të zgjedhur opozitën që do. Do ja shohin hajrin shpejt Sudes. E do Rama në krye të PD-së,”- ka deklaruar Kalaja e cila në 11 maj mori vetëm 2800 vota personale.
Deri më tani, Jorida Tabaku nuk ka reaguar ndaj këtyre akuzave. Postimi i saj i fundit në rrjetet sociale mbetet ai i falënderimit për qytetarët që e votuan në zgjedhjet e 11 majit.
