Kandidatja për deputete e PD, Albana Vokshi, në fjalën e saj gjatë takimit elektoral që u mbajt sot në Kamëz, numëroi dështimet e kryebashkiakut të këtij qyteti, Rakip Suli.
Një prej tyre, sipas Vokshit, janë edhe ndërtimet pa leje që janë shtuar shumë vitet e fundit. “Shiheni Kamzën sot, shihni rreth e rrotull jush, ndërtime pa leje që kanë mbirë si kërpurdhat” – tha ajo.
Në fakt, për të gjithë ata që kanë memorie, Kamza dhe rrethinat e saj janë “vepër” e qeverisjes së PD-së. Jo se PS-ja ka bërë ndonjë gjë më të mirë me komunën e Parisit dhe Tiranën, por të deklarosh para banorëve të Kamzës dhe Sali Berishës se shkatërrimi i kësaj zone ka ndodhur vitet e fundit, është, në mos gënjeshtër, një e pavërtetë e madhe.
E dimë që është fushatë dhe duhet të nxish njërën palë dhe të premtohen të parealizueshmet për të marrë vota. Por pak të vërteta dhe histori nuk i bëjnë keq askujt.
[video width="848" height="464" mp4="https://cdnimpuls.com/vna.al/wp-content/uploads/2025/04/WhatsApp-Video-2025-04-18-at-8.45.47-PM.mp4"][/video]
