Kryetari i Partisë Demokratike, Sali Berisha, ka deklaruar se një gjykatës ka urdhëruar SPAK-un të nisë hetime ndaj kryeministrit Edi Rama në lidhje me ndërtimin dhe regjistrimin e vilës së tij në Surrel. Deklarata u bë gjatë një takimi me qytetarë dhe mbështetës në Krujë, ku Berisha e akuzoi Ramën për shkelje të ligjit dhe fshehje të së vërtetës mbi pasurinë e tij.
Sipas Berishës, vila në Surrel ka themele dy herë më të mëdha se ato të ish-diktatorit Enver Hoxha, ndërsa e ka regjistruar në emrin e tij personal, ndryshe nga Hoxha që nuk i bëri pronë private. “Ai e ka regjistruar në emrin e tij, ndryshe nga diktatori që i la si pronë shteti,” u shpreh Berisha.
Ish-kryeministri tha se Rama ka deklaruar një vlerë prej vetëm 3,800 eurosh për ndërtimin e shtëpisë, ndërkohë që sipas tij, prona ka një oborr prej 8,300 metrash katrorë dhe toka është marrë në kundërshtim me çdo ligj.
Berisha akuzoi SPAK-un se ka tentuar të shmangë hetimin duke ia kaluar çështjen Prokurorisë së Tiranës, por kjo e fundit e ka refuzuar, duke e rikthyer sërish në SPAK. “Një gjykatës i guximshëm urdhëroi që SPAK të nisë hetimin,” theksoi ai.
Ai shtoi se rihapja e çështjes ka sjellë tronditje brenda SPAK, duke theksuar se janë zhvilluar mbledhje urgjente. “Dy ditë më parë janë bërë mbledhje emergjente. Ka rënë bombë në SPAK,” përfundoi Berisha, duke ironizuar deklaratat e Ramës për drejtuesin e SPAK, Altin Dumanin.
