Qëndrimi ynë ndaj tarifave është negociata me qeverinë e SHBA për zero tarifa. “Ne do të kërkojmë zero tarifa nga qeveria amerikane, duke kërkuar që edhe ata të na përgjigjen me të njëjtën masë,” deklaroi sot kryetari i PD, Sali Berisha, gjatë një takimi me prodhues të bimëve medicinale. Madje, Berisha tha se kishte edhe një “ilac” në rast se qeveria amerikane nuk do të pranojë uljen e tarifave. Sipas tij, qeverisja e ardhshme e PD do të kompensojë plotësisht tarifat e eksportit të vendosura nga vendet ku eksportojnë prodhuesit shqiptarë.
Ndërkohë, Berisha nuk dha shpjegime se si do të zhvillohen këto negociata, duke qenë se ai është shpallur “non grata” nga SHBA.
Kryetari i PD akuzoi gjithashtu kryeministrin Rama, duke thënë: “Që kur erdhi në pushtet, nuk ka folur asnjëherë për ullinjtë, vreshtat, për bimët mjekësore apo aromatike. Bima e vetme mjekësore për të është droga.”
Në takimin elektoral, kreu i demokratëve paralajmëroi se, me ardhjen e tij në pushtet, qeveria e PD nuk do të shfuqizojë ligjin për licencat e mbjelljes së kanabisit, por do t’i zëvendësojë ato me sherebelë dhe rigon.
