Erion Braçe, deputet i Partisë Socialiste dhe pjesë e listës së hapur të PS-së për Tiranën, është shfaqur kohët e fundit më aktiv në kritika ndaj qeverisë, një lëvizje e cila shihet si përpjekje për të mbledhur sa më shumë vota.
Në një postim të fundit në rrjetet sociale, Braçe ka denoncuar një rast në njësinë nr. 5, ku një qytetar i moshuar, Sabriu, është gjobitur me 200 mijë lekë nga Policia Bashkiake për krasitjen e pemëve të mbjella dhe mirëmbajtura nga ai vetë, pranë trekëndëshit të 1 Majit. Deputeti thekson se veprimi i Sabriut nuk përbën shkelje ligjore dhe se gjoba është krejtësisht e padrejtë.
“Ka katër muaj që ky qytetar kërkon të drejtën e tij, por nuk e gjen. Krasitja e pemëve të tua nuk është shkelje ligji!” – deklaroi Braçe.
Deputeti kritikoi ashpër Policinë Bashkiake, duke e akuzuar për sjellje arbitrare dhe për mungesë profesionalizmi. Ai kërkoi që ky institucion të jetë në shërbim të qytetarëve dhe të ndalojë veprime të tilla që dëmtojnë komunitetin.
