Edi Rama deklaroi sot se Shqipëria është i vetmi vend që zhvillon negociatat me Bashkimin Europian duke përdorur inteligjencën artificiale. Megjithatë, kryeministri nuk arriti të shpjegojë se si realizohet kjo, duke u mjaftuar me një përmendje të një marrëveshjeje me Mira Muratin, shqiptaren e njohur që ka qenë ndër të parat që punoi me IA.
Në të vërtetë, duket se Rama ende nuk ka kuptuar plotësisht që inteligjenca artificiale ka tejkaluar fazën e saj si prioritet i botës online. Madje, vetë Mira Murati është e angazhuar në zhvillimin e teknologjive që tejkalojnë IA. Për më tepër, kur Rama përpiqet të shpjegojë këtë teknologji përmes AKSH-it, situata bëhet edhe më e sikletshme. Ky institucion, i njohur për skandalin e rrjedhjes së të dhënave sensitive të qytetarëve dhe për sulmet e hakerëve iranianë, vështirë se mund të shërbejë si një model për përdorimin e inteligjencës artificiale.
Në përpjekje për të maskuar dështimet e procedurave të stërzgjatura dhe rrjedhjen e përsëritur të të dhënave, AKSH i përgatit kryeministrit fjalime me terminologji komplekse, për t’i paraqitur problemet si “ëndrra” të arritshme. Por në realitet, këto mbeten larg përditshmërisë së vështirë të shqiptarëve.
Deri më 11 maj, kur pritet të zhvillohet një tjetër fazë e negociatave me BE-në, shqiptarët mund të vazhdojnë të dëgjojnë premtime për pasaportën europiane. Por t’u premtosh se të gjitha procedurat do të kryhen përmes IA është një fyerje ndaj inteligjencës njerëzore — një cilësi që shqiptarët e zotërojnë natyrshëm dhe që nuk ka nevojë për procedurat e AKSH-it për t’u zhvilluar më tej.
