SPAK ka nisur hetim ndaj Kuvendit për postimin e posterit të Partisë Socialiste në faqen e facebook të këtij institucioni. Lajmin e ka bërë të ditur drejtuesi i partisë “Djathtas 1912”, Enkelejd Alibeaj, i cili është edhe denoncuesi i këtij rasti.
“Sapo posta më solli këtë zarf, nga SPAK. E mbani mend para 13 ditësh, kur faqja zyrtare e Kuvendit publikoi posterin elektoral të PS dhe të Edi Ramës, si detyrim ligjor dhe qytetar bëra kallzim online në SPAK. Sot mora përgjigjen, është kjo këtu. Çështja është hetuar, është mbledhur informacioni dhe është proceduar mbi hetimin për “shpërdorim detyre” – shprehet Alibeaj.
Ai më tej përshëndet gatishmërinë e SPAK për seriozitetin dhe u bën thirrje punonjësve të administratës publike të mos përfshihen në lojërat politike.
“Vetëm 13 ditë nga kallëzimi online. Një hetim i shpejt dhe serioz. Ju që punoni në administratë, njerëz të ndershëm mos u përfshini në lojën politike. Ju qytetarë mbroni të drejtën tuaj, denonconi çdo krim zgjedhor siç bëra unë. Faleminderit dhe mbështetje për SPAK-un. Drejtësia funksionon kur ne flasim” – thotë më tej Alibeaj.
