Në ditën që ishte nisur drejt SHBA-së, kreu i bashkisë së Tiranës, Erion Veliaj pretendon se prokurori i BKH-së ka kërkuar në SPAK, Ajola Xoxën. Dhe sigurisht në mungesë të tij, Veliaj, nga pozitat e pushtetarët i ka kërkuar llogari që në vigjilje të pushimeve të Vitit të Ri dhe në mungesë të tij, kush ishte personi që guxonte t'i shqetësonte familjen. Ky është reagimi i Veliajt nga paraburgimi i Durrësit, ku thotë se është "kyçur pa gjyq, prej një letre anonime, një vetingu ilegal të 20 vjetëve jetë, pa asnjë akuzë formale dhe falë një prokurori lunatik e një gjykatësi politik". Gjithë historinë ai e tregon si një përvuajtur i sistemit në të cilin bën pjesë, "Në datën 28 dhjetor udhëtoj për takim me Bankën Botërore në Uashington. Në nisje të avionit, më merr bashkëshortja, e shqetësuar se njëfarë Samet Gurguri, emër i panjohur me numër të panjohur, e kishte ftuar të kthehej edhe një herë në SPAK. Po unë? Besoj bëra atë që do të bënte çdo burrë, i rashë telefonit të numrit anonim për të kuptuar se cili nëpunës shteti komunikon me Whatsap të shtunën në sabah me një grua, nënë, në prag të Vitit të Ri? Numri nuk u përgjigj". Kjo nuk i ka pëlqyer Veliajt i cili gjithmonë i ka patur nën kontroll gjërat, ndaj dhe me metodat e tij ka arritur të gjurmojë biografinë e hetuesit. "Ah, i bëra edhe një kërkim në Google këtij Sametit e më doli një specialist në Spital të Fierit, aktivist i Partisë Demokratike, dega Libofshë, dhe komentues i rregullt kundër partizanëve, antifashistëve dhe komunistëve gjakatarë. Unë jam shumë i lumtur që PD-ja ka degë në Libofshë, pluralizmi në çdo cep të Shqipërisë është shenjë e një demokracie aktive. Jam gjithashtu i ngazëllyer që aktivistë si Sameti i japin Partisë së Kënetës kohën, energjinë dhe statuset e tyre - gjaku i ri për kërma si Saliu është jetik për mbijetesën e kufomës së tij politike. Por, si zyrtar shtetëror, Sameti duhet të çojë një fletë-thirrje, me letër e me vulë, siç ia çon çdo vrasësi - e siç do duhet t’ia çonte edhe plasësit Shkëlzen apo vrasësit Sali." Përfundon Veliaj reagimin e tij nga qelia e paraburgimit të Durrësit.
