Ndërsa Sali Berisha vijon me deklaratat për shkrirje të SPAK, mesa duket demokratët dhe shqiptarët nuk janë dakord me sulmet e tij. Këtë tregon edhe sondazhi i fundit i Barometrit pasi votuesit demokratë, në janar 2025, ishin 43,8% e tyre me vlerësim pozitiv për SPAK, sot në matjet e fundit janë 71,8% e tyre.
Përqindja e lartë e besimit në muajt e fundit, janë një tregues se sulmet e kryetarit të PD ndaj Prokurorisë së Posaçme nuk përfaqësojnë interesin e demokratëve. Edhe kur justifikon shkrirjen e SPAK duke thënë se shqiptarët nuk duan një prokurori politike, Berisha mesa duket bazohet tek problemet e tij me drejtësinë, pasi sondazhi tregon qartë se besimi i qytetarëve tek Prokuroria e Posaçme është rritur në 70.7%.
Ndryshe nga lideri i PD, kryeministri Edi Rama fushatën po e zhvillon duke u bazuar në sondazhe pavarësisht se goditjet më të shumta të SPAK janë në oborrin e qeverisë së tij. Ose të paktën këtë përshtypje të jep nga mënyra se si ndryshoi deklaratat ndaj SPAK. Pas arrestimit të kryebashkiakut Erion Veliaj, që shihej si numri dy në PS, Rama u shfaq si asnjëherë më parë duke komentuar hetimet e SPAK dhe vendimet e GJKKO, duke sulmuar disa nga prokurorët apo gjykatësit. Herë herë lëshonte edhe mesazhe kur thoshte se Shqipëria nuk do të kthehet në “Republikë Prokurorësh”.
Me gjasë sondazhet e brendshme i thonin tjetër gjë kur bëhej fjalë për drejtësinë e re, dhe për të mos humbur elektoratin që i kërkon votën për mandatin e katërt, Rama u detyrua të ndryshonte narrativën duke u rikthyer tek deklaratat se PS është e vetmja mbështetje e SPAK.
Kjo shihet edhe tek sondazhi i Barometrit i cili thotë se votuesit socialistë në janar të vitit 2025, para arrestimit të Erion Veliajt, ishin 82.5% e tyre me vlerësim pozitiv për punën e SPAK, ndërkohë në matjet e fundit 15-25 shkurt 2025 janë 74,9% e tyre. Edhe pse pak në rënie, dy javë pas arrestimit të Veliajt, sërish pjesa dërrmuese e socialistëve kanë mendim pozitiv për SPAK.
