Kryetari i Bashkisë së Tiranës, Erion Veliaj, ka reaguar nga qelia përmes një mesazhi drejtuar mbështetësve të tij, duke e cilësuar vendimin e arrestimit si të padrejtë dhe të pabazuar në fakte.
Në mesazhin e tij, Veliaj ironizon argumentet e gjykatës për masën e arrestit me burg, duke përmendur si shembull arsyetimin në faqen 278 të vendimit:
“Personi paraqet një rrezikshmëri shoqërore mjaft të lartë… nuk ka shfaqur në asnjë moment shenja të ndonjë reflektimi…”
Ai e krahason situatën e tij me raste të tjera të bujshme në Shqipëri, duke theksuar:
“Zeni, që poqi të gjallë 26 veta, dhe babi i Zenit, që vrau 4 veta me plumba në mish, nuk paraqesin rrezikshmëri. Kurse ai që mbjell pemë, hap korsi biçikletash, ndërton shkolla e parqe, duhet futur në burg.”
Veliaj shprehet se nuk do ta pranojë këtë situatë dhe e konsideron arrestimin e tij si një përpjekje për ta detyruar të dorëzohet.
“Ky s’mund të jetë një vend ku, kush vret është i lirë, e kush punon është në burg. Kjo nuk është drejtësi!” – shkruan ai.
Në fund, ai reagon ndaj pretendimeve se nuk ka shfaqur pendesë, duke theksuar se nuk është akuzuar ende për asgjë konkrete.
“Pendohu sa nuk është vonë, se të kalbëm në burg. Ky është turp, por jo drejtësi!” – përfundon mesazhin e tij Veliaj.
