Kreu i Lëvizjes Bashkë, Arlind Qori, ka reaguar pas protestës së banorëve të Tragjasit kundër projektit të ujësjellësit, duke akuzuar politikanët dhe oligarkët për grabitjen e burimeve ujore në dobi të resorteve turistike në zonë.
“Sot, qytetarët e Tragjasit po përballen me kucedrën ekonomike dhe politike që po u merr ujin. Lumi që kalon pranë fshatit të tyre po shfrytëzohet nga politikanë të korruptuar dhe oligarkë si Samir Mane, për të furnizuar resortet turistike në Palasë dhe zonën përreth. Ndërkohë, policia, e pajisur me skafandra, ka shkuar atje për të mbrojtur interesat korruptive, jo të qytetarëve,” tha Qori.
Ai u zotua se, nëse Lëvizja Bashkë do të vijë në pushtet, një nga hapat e parë do të jetë anulimi i ligjit për investitorët strategjikë. “Ky ligj trajton banorët si popullsi indigjene, duke u lejuar oligarkëve dhe politikanëve t’u rrëmbejnë pronat e të drejtat. Kjo nuk mund të jetë pjesë e kuadrit ligjor të Republikës së Shqipërisë,” deklaroi ai.
Banorët e Tragjasit dolën në protestë mëngjesin e sotëm, duke kundërshtuar projektin e ujësjellësit, i cili, sipas tyre, do t’i lërë ata pa ujë të pijshëm, ndërsa furnizon bizneset turistike në bregdet.
