Kryeministri Edi Rama ka deklaruar se energjinë për të vijuar drejt integrimit të Shqipërisë në BE e gjen te hakmarrja për padrejtësitë dhe poshtërimet e së kaluarës. Në një përgjigje për një qytetar në rubrikën “Sy m’sy”, Rama theksoi se Shqipëria është poshtëruar ndër vite, por ai synon të marrë hak duke e çuar vendin drejt anëtarësimit në BE.
“Na kanë poshtëruar shumë gjatë, si të huajt ashtu edhe tanët. Tani duhet të marrim hak duke u ulur në tryezën e BE-së,” u shpreh ai.
Ndërkohë, Rama ironizoi Partinë Demokratike, duke thënë se kjo forcë politike ka shkatërruar vendin sa herë ka qenë në pushtet.
“PD e ka bërë Shqipërinë kashtë e koqe. Zgjedhja më 11 maj është shumë e qartë: ose votë për Shqipërinë 2030 në BE, ose kthim në kënetë. Kush voton për kënetën, i bie më qafë fëmijëve të vet,” tha Rama.
Gjatë bisedës me qytetarët, kreu i qeverisë iu përgjigj edhe një komentuesi që e pyeti nëse do të kalojë oqeanin.
“Unë me oqeanin nuk kam pasur probleme, por ti qenke zgjuar në kënetë sot. Mos u çudit kur të më shohësh që jo vetëm do ta kaloj, por… nuk po flas më shumë, se dua t’ju bëj një surprizë të këndshme,” u shpreh ai, duke lënë të hapur mundësinë për lëvizje të reja në politikë.
