Berisha i paqartë për formulën e primareve/ Për listën e sigurt do të vendosë kryesia dhe statuti

Sali Berisha nuk i është përgjigjur sot pyetjes nëse ata që janë renditur të parët në primare do të jenë pjesë e listave të sigurta. Në një konferencë për shtyp kryetari i PD nuk dha një përgjigje as për pyetjen nëse ata që nuk janë kualifikuar në këtë garë do të jenë pjesë e listave. Ai vlerësoi procesin e primareve, por duket se ende nuk ka vendosur se kush do të jetë pjesë e listave të mbyllura dhe të sigurta. Me gjasë, rezultatet nuk janë ato që kishte në mendje dhe bezdisjen nuk e ka fshehur, duke folur për respektimin e kuotave dhe statutit. Kjo të bën të mendosh se gara e primareve, më shumë se një konkurrencë e vërtetë, ishte një fasadë pas së cilës kryetari i PD u përpoq të maskonte “pasionin” dhe zakonin e tij të vjetër për të kontrolluar listën e deputetëve të partisë që drejton. Pjesa më e madhe e demokratëve e kanë kuptuar këtë që në fillim. Për fatin e tyre të keq, një pjesë e vogël ka besuar se vërtet në PD mund të ketë një garë që do t’i vendosë në një vend të sigurt për deputet. Por diçka e tillë nuk ka ndodhur ende në Shqipëri dhe është e vështirë të ndodhë në dy partitë e drejtuara nga Sali Berisha dhe Edi Rama.