Në orët e fundit, një përplasje e ethshme po zhvillohet për të marrë kontrollin e Bashkisë së Tiranës, pasi kryetari i saj, Erion Veliaj, ndodhet pas hekurave të qelisë në Durrës. Ndërsa në ditët e para pas arrestimit të Veliajt, kryeministri Edi Rama mori në kontroll situatën duke mbështetur Veliajn dhe duke emëruar Anuela Ristanin si zëvendëse, duket se situata ka ndryshuar ndjeshëm.
Braktisja që Rama i bëri beniaminit të tij ka nxitur reagimin e Veliajt, i cili duket se tashmë po sfidon “shefin e madh.” Mbrëmë, Veliaj vendosi të shkarkojë Anuela Ristanin dhe të emërojë në vend të saj Sara Goxhajn, një person të afërt dhe të besuar të tij.
Burime konfidenciale bëjnë me dije se ky vendim nuk është pritur mirë nga Rama, i cili ka porositur zëvendëskryetaren Ristani të mos protokollojë shkresën e Veliajt. Gjithashtu, është kërkuar shkarkimi i drejtorit juridik të bashkisë, Alban Dokushi, i cili mendohet të jetë një tjetër njeri i afërt i Veliajt.
Për momentin, Bashkia e Tiranës ndodhet në një gjendje totale kaosi sa i takon vendimmarrjes dhe rolit të drejtuesve të saj. Gara midis Ramës dhe Veliajt është zhvendosur tashmë në Bashkinë e kryeqytetit, e cila është shndërruar në arenën e përplasjes mes kryeministrit dhe atij që dikur ishte paracaktuar si pasardhësi i tij. Ndërkohë, Veliaj vijon të mbetet në paraburgim në Durrës.
