Përplasja mes drejtuesve të futbollit botëror dhe presidentit të FIFA-s, Gianni Infantino, ka hyrë në një tjetër fazë. UEFA dhe CONCACAF i kanë dërguar një letër Infantinos, ku kërkojnë që FIFA të përdorë një pjesë të rezervave të saj financiare për t’u dhënë të paktën 10 milionë dollarë secilës prej 211 federatave anëtare.
Letra, e siguruar nga “BBC Sport”, është firmosur nga presidenti i UEFA-s, Aleksander Ceferin, dhe presidenti i CONCACAF-ut, Victor Montagliani. Në të argumentohet se FIFA pritet ta mbyllë ciklin financiar 2023-2026 me rreth 6 miliardë dollarë rezerva, shumë që sipas tyre është dukshëm më e lartë se nevojat e parashikuara të organizatës deri në Kupën e Botës 2030.
Sipas propozimit të dy konfederatave, FIFA duhet të vërë në dispozicion të paktën 10 milionë dollarë për secilën prej 211 federatave gjatë ciklit 2027-2030. Në total, kjo do të nënkuptonte një shpërndarje prej rreth 2.11 miliardë dollarësh, mbi fondet e rregullta që FIFA planifikon t’u japë federatave.
Kërkesa vjen pas polemikave rreth projektit “FIFA Forward Enterprise”, një plan i promovuar nga Infantino që parashikonte krijimin e një kompanie të re për administrimin e të drejtave komerciale dhe të biletave të kompeticioneve të FIFA-s, përfshirë Kupën e Botës. Sipas planit, 21% e kompanisë së re do t’i shitej një kompanie investimesh.
Propozimi u tërhoq pas vetëm katër ditësh, pas kundërshtimeve nga një numër i madh federatash kombëtare.
Gjatë prezantimit të planit, Infantino u kishte thënë federatave se mund të përfitonin deri në 40 milionë dollarë nëse e mbështesnin nismën. Presidenti i FIFA-s kishte vendosur 19 shtatorin si afat për federatat që të pranonin planin në mënyrë që të përfitonin nga një pagesë fillestare prej 20 milionë dollarësh.
Në letrën e tyre, Ceferin dhe Montagliani argumentojnë se analiza e pasqyrave financiare dhe buxheteve të publikuara të FIFA-s ngre pikëpyetje nëse projekti FFE ishte i nevojshëm për sigurimin e burimeve të reja financiare.
Ata kërkojnë gjithashtu një “rishikim të pavarur” të financave të FIFA-s, me akses të plotë në shifrat dhe supozimet mbi të cilat bazohen parashikimet financiare.
“FIFA aktualisht mban miliarda dollarë në rezerva të akumuluara”, thuhet në letër, ndërsa Ceferin dhe Montagliani argumentojnë se këto fonde u përkasin të gjithë futbollit dhe duhet të shërbejnë për zhvillimin e federatave anëtare.
Dy drejtuesit kërkojnë që Këshilli i FIFA-s të shqyrtojë mundësinë e një shpërndarjeje edhe më të madhe të rezervave pasi të jetë përcaktuar gjendja financiare e organizatës në fund të vitit.
Një letër tjetër, e siguruar gjithashtu nga “BBC Sport”, u është dërguar drejtuesve të konfederatave të tjera në Azi, Afrikë, Amerikën e Jugut dhe Oqeani, me kërkesën që të mbështesin nismën.
Debati vjen një ditë pasi presidentja e Federatës Angleze të Futbollit, Debbie Hewitt, i kërkoi Infantinos dhe sekretarit të përgjithshëm të FIFA-s, Mattias Grafstrom, të publikojnë të gjitha dokumentet që lidhen me projektin FFE.
Hewitt, e cila është edhe nënkryetare e FIFA-s, kërkoi gjithashtu një shpjegim me shkrim për vendimin për anulimin e pezullimit të sulmuesit të Shteteve të Bashkuara, Folarin Balogun, në Kupën e Botës.
Dokumentet dhe shpjegimet kërkohen përpara mbledhjes së ardhshme të Këshillit të FIFA-s, e planifikuar për 15 tetor.
Përplasja zhvillohet në prag të zgjedhjeve presidenciale të FIFA-s. Infantino, 56 vjeç, pritet të kandidojë për një mandat të katërt në zgjedhjet e marsit, ndërsa federatat që kërkojnë një kandidat alternativ kanë afat deri më 18 nëntor për ta propozuar atë.
