Gjithçka është zyrtarizuar për edicionin e vitit 2027 të Superkupës së Spanjës, e cila këtë herë do të zhvillohet në Stamboll të Turqisë. Turneu do të sjellë përballë katër prej klubeve më të mëdha të futbollit spanjoll: Barcelonën, Real Madridin, Atletico Madridin dhe Real Sociedadin.
RFEF ka finalizuar marrëveshjen me autoritetet turke, ndërsa presidenti i federatës spanjolle, Rafael Louzan, mori pjesë të enjten në ceremoninë zyrtare të nënshkrimit në selinë e Federatës Turke të Futbollit. Në aktivitet ishin të pranishëm edhe ministrat turq të Sportit dhe Kulturës e Turizmit, si dhe përfaqësues të institucioneve sportive të Turqisë dhe Arabisë Saudite.
Stambolli u përzgjodh pas një procesi vlerësimi ku RFEF, në bashkëpunim me kompaninë SELA, shqyrtoi shtatë kandidatura nga vende të ndryshme. Arabia Saudite, e cila ka qenë shtëpia e zakonshme e Superkupës që nga viti 2020, nuk do ta presë turneun në vitin 2027 për shkak të përplasjes në kalendar me Kupën e Azisë. Turneu do të rikthehet në Arabinë Saudite në vitin 2028.
Edicioni i ardhshëm do të jetë një përballje mes Barcelonës, Real Madridit, Atletico Madridit dhe Real Sociedadit. Barcelona, kampione e Superkupës së vitit 2026, do të kërkojë të mbrojë trofeun në Turqi.
Ndeshja e parë gjysmëfinale do të luhet më 2 shkurt 2027 dhe do të përballë Barcelonën me Atlético Madridin. Takimi do të zhvillohet në stadiumin e Fenerbahçes, “Chobani Stadium Fenerbahçe Şukru Saracoglu Sports Complex”, në orën 20:00 sipas orës spanjolle, ose 22:00 me orën lokale të Stambollit.
Një ditë më pas, më 3 shkurt, Real Sociedad do të përballet me Real Madridin në “Tupras Stadium”, stadiumi i Besiktasit. Edhe kjo ndeshje do të nisë në orën 20:00 sipas orës së Spanjës.
Finalja do të zhvillohet më 6 shkurt në “Ali Sami Yen Sports Complex RAMS Park”, stadiumi ku luan ndeshjet si vendas Galatasaray. Arena ka një kapacitet prej më shumë se 53 mijë spektatorësh dhe do të jetë skena ku do të kurorëzohet fituesi i Superkupës së Spanjës 2027.
40 milionë euro për katër klubet
Përveç trofeut, pjesëmarrja në Superkupë sjell edhe një përfitim të rëndësishëm financiar. Sipas marrëveshjes së raportuar nga “AS”, katër klubet pjesëmarrëse kanë rënë dakord të ndajnë 40 milionë euro të ardhura nga pjesëmarrja në turne.
RFEF thekson se të ardhurat e krijuara nga organizimi i Superkupës jashtë Spanjës kanalizohen drejtpërdrejt në mbështetje të futbollit spanjoll. Sipas federatës, përfitimet shkojnë te pothuajse 1,000 klube të të gjitha kategorive, si në futbollin e meshkujve ashtu edhe në atë të femrave.
Superkupa e Spanjës është tashmë një nga aktivitetet e rëndësishme të kalendarit ndërkombëtar të futbollit dhe edicioni i vitit 2027 pritet të transmetohet në më shumë se 150 vende në mbarë botën. Për Stambollin, organizimi i turneut përfaqëson gjithashtu një mundësi për të promovuar qytetin si destinacion për evente të mëdha sportive ndërkombëtare.
