Gara për “Topin e Artë” 2026 po bëhet gjithnjë e më e fortë, ndërsa në qendër të debatit janë dy prej yjeve më të mëdhenj të futbollit aktual, Lamine Yamal i Barcelonës dhe Kylian Mbappe i Real Madridit. Të dy kanë shprehur hapur bindjen se e meritojnë çmimin prestigjioz individual, duke e bërë përballjen mes tyre edhe më interesante.
Lamine Yamal ka folur për këtë temë në emisionin Universo Valdano të Movistar, në një intervistë që pritet të transmetohet të premten. Ylli i Barcelonës ka qenë më i drejtpërdrejtë se kurrë më parë kur është pyetur se kujt do t’ia jepte “Topin e Artë”.
“Kujt do t’ia jepja ‘Topin e Artë’? Sinqerisht, mendoj se ndoshta ka vetëm dy lojtarë që janë më të mirët në botë, por unë e meritoj atë këtë vit”, është shprehur Yamal.
19-vjeçari më pas e ka bërë edhe më të qartë se cilët konsideron si dy lojtarët kryesorë në garë. “Për mua, unë dhe Kylian Mbappe jemi dy lojtarët më të mirë dhe kushdo që i ndjek ndeshjet e di këtë”, ka deklaruar ai.
Yamal vjen në këtë garë pas një sezoni të jashtëzakonshëm, ku fitoi Kupën e Botës me Spanjën dhe titullin e La Ligës me Barcelonën, ndërsa u shpall edhe lojtari më i mirë i kampionatit spanjoll për sezonin 2025-26.
Nga ana tjetër, edhe Mbappe ka bërë të qartë se e sheh veten si një kandidat serioz për çmimin. Sulmuesi francez argumenton se “Topi i Artë” është një çmim individual dhe se këtë vit ka bërë diçka të veçantë.
“Gjithmonë kam besuar se ‘Topi i Artë’ duhet të shpërblejë një lojtar që spikat. Sigurisht, ekziston edhe aspekti kolektiv, i cili është i rëndësishëm sepse futbolli është sport në grup. Por, ky është një çmim individual”, ka thënë Mbappe.
Më tej, ai është shprehur edhe më i bindur për shanset e tij: “Mendoj se ofrova diçka ndryshe këtë vit. Prandaj besoj se mund ta fitoj ‘Topin e Artë’”.
Mbappe shënoi 42 gola në 44 ndeshje për Real Madridin dhe fitoi “Këpucën e Artë” të Kupës së Botës, por madrilenët e mbyllën sezonin pa një trofe madhor. Yamal, ndërkohë, ka avantazhin e trofeve të fituara me Barcelonën dhe Spanjën.
Ceremonia e “Topit të Artë” do të zhvillohet më 26 tetor në Londër, ndërsa fituesi do të përcaktohet nga votat e gazetarëve.
