Shpallja e 30 kandidatëve për “Topin e Artë” 2026 ka shkaktuar polemika të forta në Katalonjë, veçanërisht për shkak të mungesës së dy prej yjeve të Barcelonës, Pedrit dhe Raphinhas. Të dy futbollistët nuk janë përfshirë në listën përfundimtare, një vendim që ka ngjallur reagime të shumta në mediat pranë klubit katalanas.
Gazetari Alfredo Martinez, në një koment për gazetën katalanase “Sport”, ka vënë në pikëpyetje rëndësinë dhe kredibilitetin e çmimit, duke e lidhur drejtpërdrejt me përjashtimin e dy futbollistëve të Barcelonës.
“A është vërtet kaq e rëndësishme ta fitosh ‘Topin e Artë’? Një çmim që nuk përfshin Pedrin dhe Raphinhan mes 30 lojtarëve më të mirë të sezonit humbet kredibilitetin që në fillim”, shkroi Martinez.
Sipas tij, futbolli do të ketë gjithmonë një element subjektiv dhe është normale që preferencat e votuesve të ndryshojnë. Megjithatë, gazetari katalanas argumenton se disa prej vendimeve të listës janë shumë të vështira për t’u justifikuar.
Martinez vlerëson se Pedri dhe Raphinha duhet të konsiderohen pa shumë diskutim mes 10 apo 15 futbollistëve më të mirë në botë, duke kritikuar faktin që emra të tjerë janë përfshirë në listë në vend të tyre.
“E vërteta e madhe është se nuk do të biem kurrë dakord, sepse secili ka preferencat e veta dhe kjo është krejtësisht normale”, shkroi ai, duke pranuar se debati për “Topin e Artë” nuk do të marrë fund kurrë.
Gazetari ngre gjithashtu pikëpyetje mbi rëndësinë që i është dhënë ndër vite këtij çmimi. Sipas tij, historia e futbollit ka treguar se një lojtar mund të ndërtojë një karrierë madhështore edhe pa fituar “Topin e Artë”.
Kritika e tij shkon edhe më tej, duke e cilësuar çmimin si një produkt të fuqishëm mediatik dhe marketingu.
“Në fund, është edhe një produkt marketingu dhe shitjeje imazhi. Në fakt, organizatorët përfitojnë më shumë prej tij sesa vetë lojtarët”, shkroi Martínez.
Sipas tij, tifozët e Barcelonës nuk kanë nevojë për një çmim individual për të kuptuar vlerën e futbollistëve të tyre. “Shumica e tifozëve do t’i vlerësojnë lojtarët e tyre njësoj, pavarësisht nëse e fitojnë apo jo çmimin. Ata e dinë më mirë se kushdo se çfarë u japin këta lojtarë skuadrave të tyre dhe cili është niveli i tyre i vërtetë në fushë”, argumentoi ai.
Martinez kritikoi gjithashtu autoritetin që futbolli i ka dhënë “Topit të Artë”, duke theksuar se çmimi shpesh trajtohet sikur të ishte një verdikt absolut për futbollistin më të mirë në botë, ndërsa në realitet fituesi përcaktohet nga votat e gazetarëve me preferenca të ndryshme.
“I kemi dhënë të gjithë ‘Topit të Artë’ një autoritet të ekzagjeruar, pothuajse sikur të ishte një doktrinë. Në realitet, bëhet fjalë për një grup gazetarësh, secili me shijet e veta, që duhet të na tregojnë kush është më i mirë: Ky lojtar apo ai tjetri”, shkroi ai.
Në përfundim, gazetari katalanas u shpreh se Barcelona nuk ka nevojë për një vlerësim individual për të përcaktuar nivelin e futbollistëve të saj.
“Le t’ia japin kujt të duan. Barcelona i di shumë mirë se cilët janë ‘Topat e Artë’ që ka brenda skuadrës së saj. Faleminderit”, përfundoi Martinez.
