Transferimi i Mirlind Dakut nga Rubin Kazani te Spartaku i Moskës ka shkaktuar reagime edhe jashtë Rusisë, ndërsa sulmuesi i Kombëtares shqiptare është bërë objekt i një mesazhi provokues nga tifozët e Crvena Zvezdës.
Gjatë derbit të Beogradit ndaj Partizanit, të zhvilluar më 6 shtator dhe të fituar 2-1 nga Crvena Zvezda, tifozët e skuadrës vendase shpalosën në tribunë një banderolë drejtuar Spartakut të Moskës dhe transferimit të Dakut.
Mesazhi, i shkruar në gjuhën ruse, ishte një referencë fyese ndaj origjinës shqiptare të sulmuesit dhe e cilësonte afrimin e tij si “turp” për klubin moskovit.
Banderola tërhoqi vëmendjen e mediave ruse dhe serbe, edhe për faktin se Crvena Zvezda dhe Spartaku i Moskës kanë marrëdhënie të afërta mes grupeve të tifozëve. Pavarësisht kësaj, afrimi i një futbollisti shqiptar në klubin rus nuk është pritur mirë nga disa prej ultrasve të Spartakut dhe tashmë ka shkaktuar reagime edhe në Beograd.
Në fushë, ndërkohë, Daku po përpiqet t’u përgjigjet polemikave me paraqitjet e tij. Sulmuesi e ka nisur pozitivisht aventurën te Spartaku i Moskës, duke regjistruar deri tani një gol dhe dy asistime. Edhe te Rubin Kazani ai kishte nisur sezonin me ritëm të lartë, duke shënuar tre gola.
Transferimi i Dakut te Spartaku u realizua për rreth 11 milionë euro dhe përbën një nga lëvizjet më të rëndësishme të karrierës së sulmuesit shqiptar. Pavarësisht provokimeve dhe zhurmës jashtë fushës, Daku duket se ka zgjedhur të mos përfshihet në polemika, duke e përqendruar vëmendjen te futbolli dhe objektivat e tij me fanellën e Spartakut.
