Superkompjuteri i Opta-s ka publikuar parashikimet e para për sezonin e ri të Ligës së Kampionëve dhe Arsenal dhe Bayern Munich shihen si dy favoritët kryesorë për të fituar trofeun. Parashikimet janë bërë përpara nisjes së fazës së ligës, e cila do të startojë të martën, më 8 shtator.
Sipas 10 mijë simulimeve të realizuara nga superkompjuteri, Arsenali është skuadra me më shumë gjasa për të triumfuar në Champions League, me 21.2 për qind probabilitet. “Topçinjtë” kanë gjithashtu 93.1 për qind shanse për të kaluar në fazën me eliminim direkt dhe 34.7 për qind mundësi për të arritur në finalen e madhe.
Në vendin e dytë renditet Bayern Munich, me 19.9 për qind mundësi për të fituar trofeun. Gjermanët konsiderohen edhe skuadra me më shumë gjasa për ta mbyllur fazën e ligës në vendin e parë, me 19.8 për qind probabilitet.
Manchester City është skuadra e tretë favorite, me 12 për qind shanse për të fituar Champions League. Pas anglezëve vjen Paris Saint-Germain, kampioni në fuqi, me 7.7 për qind mundësi për të triumfuar për të tretin vit radhazi.
Barcelona renditet në vendin e pestë me 7 për qind shanse për të fituar trofeun, ndërsa Real Madridi dhe Liverpooli vlerësohen me nga 5.1 për qind. Për Realin, shifra është veçanërisht e ulët në krahasim me dominimin historik të klubit në këtë kompeticion, me madrilenët që kanë fituar 15 herë trofeun.
Në dhjetëshen e favoritëve përfshihen edhe Manchester United, me 3.7 për qind, Interi me 3.4 për qind dhe Aston Villa me 2 për qind.
Pas dhjetë skuadrave kryesore vijnë Borussia Dortmund me 1.8 për qind, Roma dhe Sporting Lisbona me nga 1.4 për qind, si dhe Club Brugge me 1 për qind. Ndërkohë, 22 skuadra të tjera kanë më pak se 1 për qind shanse për ta fituar kompeticionin.
Në fund të renditjes së Opta-s janë Shakhtar Donetsk, Slovan Bratislava dhe debutuesit e Sabahut, të cilëve superkompjuteri u jep vetëm 0.01 për qind mundësi për të fituar Champions League. Sipas simulimeve, edhe këto skuadra kanë arritur të triumfojnë të paktën një herë në 10 mijë skenarët e simuluar.
Sezoni i ri i Champions League do të zhvillohet sërish me formatin e fazës së ligës me 36 skuadra. Tetë ekipet e para do të kualifikohen direkt në fazën e 1/8-ve, ndërsa skuadrat e renditura nga vendi i nëntë deri në të 24-in do të luajnë në play-off për të siguruar një vend në fazën tjetër. Finalja do të zhvillohet më 5 qershor 2027 në stadiumin “Metropolitano” të Madridit.
