Komisioni i Disiplinës ka marrë masa të forta pas tensioneve të regjistruara në ndeshjen mes Elbasanit dhe Vllaznisë.
Presidenti i klubit shkodran, Alban Xhaferi, është dënuar me 15 ndeshje pezullim për sulm ndaj zyrtarëve të ndeshjes. Gjatë gjithë periudhës së pezullimit, Xhaferit i ndalohet gjithashtu hyrja në stadiume.
Masë disiplinore është marrë edhe ndaj trajnerit të Vllaznisë, Edi Martini, i cili u ndëshkua me karton të kuq pas protestave ndaj vendimeve të arbitrave. Tensionet erdhën në një takim ku shkodranëve iu anuluan edhe dy gola për pozicion jashtë loje.
Për shkelje të rregullave themelore të sjelljes ndaj zyrtarëve të ndeshjes, Martini është dënuar me 6 javë pezullim.
Ndëshkimit nuk i ka shpëtuar as Elbasani. Klubi verdheblu është gjobitur me 1 milion lekë për organizim jo të mirë të ndeshjes ndaj Vllaznisë.
Ndërkohë, tensione pati edhe në sfidën Skënderbeu-Dinamo. Trajneri i kryeqytetasve, pas protestave ndaj vendimeve të zyrtarëve të ndeshjes, është dënuar me dy ndeshje pezullim nga veprimtaritë.
