Një moment i veçantë ka shoqëruar përballjen mes Ajaxit dhe Sionit në Ligën e Konferencës, ku një prej talenteve të akademisë së klubit holandez ka mahnitur tifozët me një performancë të jashtëzakonshme.
Para nisjes së takimit, Ajaxi kishte organizuar një sfidë për të rinjtë e akademisë, ku 11-vjeçari Sybu Zeldenthuis u bë protagonist. Klubi kishte premtuar se për çdo prekje të topit do të dhuronte nga një euro për bamirësi, por ajo që nisi si një aktivitet argëtues u shndërrua shumë shpejt në një spektakël të vërtetë.
Zeldenthuis nisi të mbante topin në ajër dhe nuk dukej se kishte ndërmend të ndalej. Për minuta të tëra, 11-vjeçari kontrolloi topin në mënyrë të përsosur, ndërsa tifozët në stadium e ndiqnin me entuziazëm dhe prisnin momentin kur seria e tij do të përfundonte.
Megjithatë, kjo nuk ndodhi as pasi numri i prekjeve kaloi 3,000. Organizatorët u detyruan të ndërpresin sfidën vetëm sepse duhej të niste ndeshja.
Në fund, Zeldenthuis e mbylli performancën e tij me plot 3,085 prekje të topit, duke marrë duartrokitjet e gjithë stadiumit dhe duke u bërë një prej protagonistëve më të veçantë të mbrëmjes.
Në fushë, ndërkohë, Ajaxi arriti një fitore spektakolare 5-3 ndaj Sionit. Me rezultatin e përgjithshëm 9-5 pas dy ndeshjeve, skuadra holandeze siguroi kualifikimin në fazën e ligës së Ligës së Konferencës.
