Ish-presidenti i UEFA-s dhe legjenda e futbollit francez, Michel Platini, ka lëshuar akuza të forta ndaj presidentit aktual të FIFA-s, Gianni Infantino, duke deklaruar se ai duhet të largohet nga drejtimi i futbollit botëror.
Gjatë një interviste për emisionin “Canal Football Club”, Platini e akuzoi ish-bashkëpunëtorin e tij të ngushtë se ka pasur gjithmonë një prirje të fortë drejt pushtetit.
“Gjithmonë e kam ditur se i pëlqenin shumë paratë dhe pushteti”, deklaroi Platini, duke kujtuar vitet kur të dy punonin së bashku në UEFA. Nga viti 2007 deri në vitin 2015, Platini drejtonte organizatën europiane të futbollit, ndërsa Infantino ishte sekretar i përgjithshëm.
Marrëdhënia mes tyre tashmë është kthyer në një përplasje të hapur. Platini ka ngritur padi ndaj presidentit të FIFA-s në Francë, me akuza që përfshijnë “ushtrim të ndikimit të paligjshëm”, “komplot kriminal për shpifje” dhe “kallëzim të rremë”.
Fituesi i trefishtë i Topit të Artë kritikoi ashpër edhe mënyrën se si drejtohet sot futbolli botëror, duke i cilësuar drejtuesit e tij si “burokratë të çmendur”.
Sipas Platinit, pushteti i vërtetë në futboll nuk u përket drejtuesve të institucioneve, por futbollistëve. Ai përmendi Kylian Mbappé, Zinedine Zidane dhe Diego Maradona si shembuj të figurave që përfaqësojnë vërtet sportin.
“Futbolli është një festë e mrekullueshme. Ndeshjet janë ato që kanë rëndësi. Pjesa tjetër është thjesht politikë”, u shpreh ish-kapiteni i Francës.
Platini shkoi edhe më tej në kritikat ndaj Infantinos, duke pretenduar se presidenti i FIFA-s ka dështuar në rolin e tij si garantues i rregullave të lojës.
“Nëse UEFA dëshiron ta rrëzojë Infantinon, kjo do të bëhet përmes gjykatave. Ai ka dështuar sepse duhej të ishte garantuesi i rregullave të lojës, por nuk i respektoi ato. Ai duhet të largohet!”, deklaroi Platini.
Në fund, 71-vjeçari përjashtoi mundësinë e një rikthimi të tij në drejtimin e klubeve apo institucioneve të futbollit, duke deklaruar se për të ky kapitull është përfundimisht i mbyllur.
